രോഗം

പണ്ട് റസ്സൽ പറഞ്ഞു,
മതം ഒരു രോഗമാണെന്ന്.
ഇന്നു എന്നിലെ സഹൃദയൻ തിരിച്ചറിയുന്നു...
കവിതയും ഒരു രോഗമാണെന്ന്.
തലമുറകളിൽ നിന്നും തലമുറകളിലേക്കു
പകരുന്ന ഒരു ജനിതക ജന്യ രോഗം!
തുഞ്ചനിൽ നിന്ന് കുഞ്ചനിലേക്ക്,
‘ജി’യിൽ നിന്ന് ‘പി’യിലേക്ക്,
വയലാറിൽ നിന്നു കടമ്മനിട്ടയിലേക്ക്,
ഉള്ളൂരിൽ നിന്നു മൂലൂരിലേക്ക്
രോഗം പടർന്നു കൊണ്ടേയിരുന്നു...
ഈ രോഗത്തിനു
പ്രത്യക്ഷത്തിൽ പ്രകടമായ ലക്ഷണമേയില്ല..
സച്ചിദാനന്ദനു ‘പനി’യിലായിരുന്നു തുടക്കം,
കെ.ജി.എസ്സിനു ‘കഷണ്ടി’യിലും,
ഒ.എൻ.വി. യെ
ഉജ്ജയിനിയിലേക്കു നടത്തിയതും,
ചുള്ളിക്കാടിനെ
മാനസാന്തരപെടുത്തിയതും
ഇതേ രോഗം തന്നെ.
ഒരു പക്ഷേ,
അവരിൽ നിന്നാവാം ഞെങ്ങളിലേക്ക്,
പുതു തലമുറയിലേക്കുള്ള
ഈ രോഗത്തിന്റെ പകർച്ച.
********